இவர் தென் கொரியாவின் முன்னணி கவிஞர். முன்னாள் பெளத்த துறவி. ஆசிய நிலக்காட்சிகள், பெளத்தம், கொரிய யுத்தத்தின் எதிரொலிகள் போன்றவற்றால் ஆனது இவருடைய கவியுலகம். நூற்றுக்கும் மேற்பட்ட கவிதைத் தொகுதிகளை வெளியிட்டுள்ளார்.
மொழியாக்கம் செய்யப்பட்டுள்ள இக்கவிதைகள் அவருடைய “First Person Sorrowful” மற்றும் “What?: 108 Zen Poems” ஆகிய தொகுப்புகளிலிருந்து தேர்ந்தெடுக்கப்பட்டவை.
கோ யுன் (1933- )
பனிப்பொழிவு
*
வெள்ளை வண்ணத்துப்பூச்சி
கவனி.
ஒரு வெள்ளை வண்ணத்துப்பூச்சியும் ஞானத்தின் ஆவியும்
முட்டாள் சமுத்திரத்தின் மேலே
பறந்து கொண்டிருக்கிறது.
உலகத்தின் எல்லா புத்தகங்களும் மூடிக்கொள்கின்றன.
*
இரண்டு பிச்சைக்காரர்கள்
தங்களுக்கு அளிக்கப்பட்ட உணவை
பகிர்ந்து கொள்கிறார்கள்.
உக்கிரமாய் ஒளிர்கிறது
புது நிலவு.
*
குழந்தை
நீ பிறப்பதற்கு முன்பு
உன் தந்தைக்கு முன்பு
உன் தாய்க்கு முன்பு
அங்கே உன் இரைச்சல் இருந்தது.
*
ஆந்தை
ஆந்தையே
மதிய வேளையில்
பளபளக்கும் கண்களுடன்
ஒன்றையும் பார்க்க முடியாது.
பொறு,
உன்னுடைய இரவு நிச்சயமாக வரும்!